ගෙවැටෙහි අද්දර රෝස කැකුළකට
ලංවී හෙමිහිට කිව්වෙමි රහසක්
"නොකියනු කාටත්!"
ඈට මිමිණුවෙමි
ඈ වෙත පැමිණි - පොඩි මී මැස්සි
රහස දන්නවලු
මේ මල් කුමරි රහස් රකින හැටි!
මට හොඳ පාඩම්!
හනිකට ගැස්සී පොඩි මී මැස්සි
රූං කියාගෙන ඉහළට ඉස්සී
අඹ ගහ මුදුනේ රහස කියනවලු
සද්දෙන් සර සර - සොලවා කොළ හැම
ළඟින් ඇදෙන සිහිලැල් මඳ හුළඟට
අඹ ගහ හෙමිහිට රහස මිමිණුවලු
මඳ සුළඟට පැන - සමණල පැංචිත්
"ඇත්තම ඇත්තද?!" කියලා ඇහුවලු
රහස දැනං උන් සපත්තු මල් හැම
රේණු සල සලා - ඔච්චම් කළාලු
"ඩිංගක් එන්නකො - මේ අහගන්නකො"
සතුටින් පැන ආ පැණි කිරිල්ලිටත්
සපත්තු මල් හැම රහස මිමිණුවෙලු
සතූටින් උඩ පැන - කිචි බිචි ගා ඈ
හිරු රැස් අමතා සද්දෙන් කිව්වෙලු
අනේ බලන්නකො - හරිම දුකයි මට
කාටත් රහසක් රැක ගනු බැරි හැටි
හෙමිහිට රහසක් කිව්ව නිසා මං
ගෙවැටෙහි අද්දර රෝස කැකුළකට.
["කැරිබියන් සුළඟ" කවි පොතෙන්]
ඇන්ඳේ- රුවන්මලී
ඩොරති වයිට්ෆීල්ඩ්
පරිවර්තනය - ප්‍රශංසනී පරණවිතානමේ බූන්දිය ඔබේ මූණු පොතට එක් කරන්න | Share this Boondi on Facebook
|
